一位叔叔坐在輪椅上，由職員緩緩地推進診症室。
這是一所政府資助老人院，我下午到來外展到診。
翻查紀錄，叔叔今年只有67歲，有高血壓和糖尿病，幾年前因中風導致左邊身乏力，故此不良於行，需要用輪椅出入。
「 叔叔，最近有冇乜唔舒服？」我先發問。
「 係左邊隻手同膊頭痛囉，左邊身喐唔到。」叔叔說話清晰，完全能夠表達自己的意思。
「 等我同你檢查一下。」我嘗試叫他舉起左手，他完全提不起來。我再舉高他的左邊肩膊，的確有點緊，難怪他申訴痛肩。中風後關節容易變緊，多做被動式的伸展對此類痛症會有幫助。
「 我哋開啲藥畀你試吓，睇下有冇幫助？同埋試吓叫物理治療師同你做下伸展，睇吓會唔會好啲？」我嘗試提出解決方法。
「 醫生呀，我隻左手幾時先會好番，好似隻右手郁得咁好？」叔叔突然對我說。
叔叔中風已有多年，左邊身一直不能移動，就算再怎樣鍛練，說坦白緊本無可能恢復原本狀態，我們也沒有靈丹妙藥可以即時解決他的問題，作為醫生其實有時也愛莫能助。
「 叔叔，坦白講，你隻左手唔會去番以前咁。。。其實你平時有冇乜嘢做唔到，但係其實又好想做，我哋睇下有冇辦法做啲訓練， 或者用的輔助工具幫下你，等你做到？」我嘗試坦白，但又嘗試提出可行的解決方法。
中風左邊身乏力，我們說是 impairment，但透過訓練加上輔助工具，他未必不能應付自己的生活所需。故此 impairment 未必一定會令人有 disability。
「我淨係想隻左手變番同以前一樣，好似右手咁囉。」叔叔神情顯得無奈。只有 67歲，神智正常，卻因中風而連走步路也不行，當然是難以接受。
「我意思係，例如你想係老人院自由出入吓，我地可以試吓你用唔用到輪椅； 如果你唔想用尿片，我地試吓用尿壺，或有練過床用便椅。。。 你有冇乜嘢想做到？」 我嘗試再解釋。
叔叔沉默了片刻，然後再說:「我淨係想隻左手好似以前咁。」
也許叔叔對他的中風還是未能接受，或是他還沒有想過，縱使左邊身不能動彈，其實還有很多不同的可能性。
三言兩語，一時間也難以令他完全了解。
「 不如叫社工同物理治療師幫幫手，同佢傾下，睇下有咩可以做到？」 我唯有建議。
面對困難，總不能只說不行；認清現實，再想想有沒有方法，可以找出你未曾想過的可能性，或許會令你有全新的觀點與看法。
而我們醫護人員一定會在你身旁與你同行。
Search